და ყოველთვის განსაკუთრებული აღტაცებით ვაკვირდებით ვარსკვლავების ახალ გამოსვლებს წითელ ხალიჩაზე — იქნება ეს „ოსკარი“, Met Gala თუ მოდის კვირეულის მორიგი მარათონი. დახვეწილი ანსამბლები ფართო ქვედაბოლოებით, ქანდაკებითი სილუეტები, რომლებიც ფიგურას გამოკვეთს, მომხიბვლელი ჭრილები და ბრწყინვალე კრისტალების ჩანაწერი — თითოეული ლუქი არა მხოლოდ შთამბეჭდავია, არამედ ერთგვარ ისტორიასაც ჰყვება.

თუმცა დაფიქრებულხართ, ვინ დგას ამ ყველაფრის მიღმა? ის შთამბეჭდავი გამოჩენები, რომლებსაც ვხედავთ პრესტიჟულ ცერემონიებზე, სტილისტების ნაფიქრი ნამუშევარია. სწორედ ისინი ეხმარებიან არტისტებსა და მსახიობებს, რომ იპოვონ უნიკალური სტილი.

დღეს გაგაცნობთ ხუთ გამორჩეულ ვარსკვლავთა სტილისტს, რომლებმაც უკვე დატოვეს კვალი მოდის ისტორიაში.

ლოუ როუჩი

ლოუ როუჩის გავლენას მოდის ინდუსტრიაზე ვერ უარვყოფთ. ამერიკელი სტილისტი, რომელიც „იმიჯის არქიტექტორად“ იწოდება, წლების განმავლობაში ქმნიდა ყველაზე გამორჩეულ ვარსკვლავურ ლუქებს, სანამ 2023 წელს, პოპულარობის პიკზე, კარიერის დასრულება არ გამოაცხადა. მისი კლიენტები იყვნენ: სელინ დიონი, ტომ ჰოლანდი, ანია ტეილორ-ჯოი, არიანა გრანდე, ნაომი კემპბელი და კიდევ უამრავი A-ლისტის ვარსკვლავი.

თუმცა, მიუხედავად ოფიციალური გადადგომისა, ლოუ როუჩმა მოდის სამყაროს დატოვება ვერ შეძლო. მისი ერთ-ერთი გამორჩეული კლიენტი კვლავაც ზენდეაა — მსახიობი, რომელთანაც მას არა მხოლოდ მრავალწლიანი შემოქმედებითი თანამშრომლობა, არამედ ნამდვილი მეგობრობაც აკავშირებს. სწორედ ის დგას ზენდეას სტილის ევოლუციის უკან, რომელმაც მას „დისნეის ვარსკვლავიდან“ ნამდვილ მოდის ხატად აქცია. საკმარისია გავიხსენოთ მისი უნიკალური ლუქები „დიუნის“ და „სუპერ მეტოქეების“ პრომო-ტურებზე — დიახ, ესეც ლოუ როუჩის დამსახურებაა.

ჯარედ ელნერი

ერთ-ერთი ყველაზე გამორჩეული ახალგაზრდა სტილისტი, რომელმაც მოდის ინდუსტრიაში სწრაფად მოიპოვა აღიარება თავისი არასტანდარტული მიდგომითა და უნარით, შეერწყა თამამი ტრენდები დახვეწილ დეტალებთან. თავდაპირველად ჯარედ ელნერი ცნობილი გახდა ამერიკელი ინფლუენსერის, ემა ჩემბერლენის სტილის შექმნით, რომელსაც Met Gala-სთვის სამწლიანი თანამშრომლობის განმავლობაში უნიკალური იმიჯები შეუქმნა. თუმცა, ნამდვილი პოპულარობა მოიპოვა მას შემდეგ, რაც საბრინა კარპენტერთან დაიწყო მუშაობა.

სტილისტის დახმარებით მომღერალი „პოპ-პრინცესადან“ მოდის თვითდაჯერებულ და მომხიბვლელ ხატად გარდაიქმნა. განსაკუთრებული ყურადღება მიიპყრო ელნერის ბოლო ნამუშევარმა საბრინასთვის „გრემის 2025“-ზე — ძველი ჰოლივუდის ესთეტიკით შთაგონებული, მორგებული მაქსი კაბა JW Anderson-ისგან, რომელიც მორგებული სილუეტით, ბუმბულებითა და ბზინვარე ბრილიანტის სამკაულით იყო გაფორმებული.

დანიელ გოლდბერგი

კიდევ ერთი სტილისტი, რომელიც ჰოლივუდის it-girls-ისთვის შეუცვლელი გახდა, როდესაც საქმე შთამბეჭდავი იმიჯის შექმნას ეხება. მისი ხელწერა თანამედროვე მინიმალიზმითა და მოულოდნელი აქცენტებით გამოირჩევა. გოლდბერგი უპირატესობას ანიჭებს სუფთა ხაზებს, ნეიტრალურ ფერებსა და მაღალხარისხიან მასალებს, ქმნის ლუქებს, რომლებიც თავდაჯერებულობასა და ელეგანტურობას ასხივებს.

მისი სტილი მკაფიოდ შეინიშნება სირშა რონანის გამოსვლებში, რომელიც წითელ ხალიჩაზე ხშირად ირჩევს ტექსტურით გამორჩეულ სამოსს ან რთულ ფერთა პალიტრას. ასევე, გოლდბერგი თანამშრომლობს მიშელ იეოსთან, რომლის ლუქებიც ყოველთვის კლასიკური ელეგანტურობისა და თანამედროვე ელემენტების სრულყოფილ ბალანსს წარმოადგენს.