საქართველოს საფეხბურთო ვარსკვლავის, გიორგი მამარდაშვილის და მისი მომხიბვლელი საცოლის, ელენე ეპიტაშვილის ცხოვრებაში კიდევ ერთი საოცარი მომენტი დადგა. წყვილმა მათი პირველი შვილის სქესის გამჟღავნების ღონისძიება გამართა, რომელიც არა მხოლოდ ოჯახური სიხარულის, არამედ საზოგადოების განხილვის თემად იქცა.

ღონისძიებაზე ჩვენი ყურადღება მიიპყრო ელენე ეპიტაშვილის თეთრი კაბის ელეგანტურმა სილუეტმა და ნატიფმა დეტალებმა. როგორც მოვიანებით გაირკვა, კაბის დიზაინი ლალიკო ძამაშვილის შექმნილია.

ქალბატონი ლალიკო ქალის ტანსაცმლის კონსტრუქტორია. როგორც თავად აღნიშნავს, დიზაინერობაზე პრეტენზია არ აქვს, თუმცა ინდივიდუალური დიზაინით არა ერთი საინტერესო კოსტიუმი შეუქმნია:

„საკმაოდ კარგად ვერკვევი კონსტრუქციაში, ქსოვილის ტექნოლოგიურ დამუშავებაში, შემიძლია დიზაინზე მუშაობა... მაგრამ გეტყვით, მეამაყება, რომ ვარ ქალის ტანსაცმლის კონსტრუქტორი“ - აღნიშნავს ლალიკო.

„ფეხბურთის გულშემატკივარი არასდროს ვყოფილვარ, თუმცა ეროვნული ნაკრების ფეხბურთელების შემართებამ და დიდმა წარმატებამ მეც ამიყოლია, ისევე, როგორც მთელი ჩვენი საზოგადოება. ამ ყველაფერს ფონად დაჰყვებოდა პირობები, რომელსაც მოგების შემთხვევაში შეასრულებდნენ როგორც ფეხბურთელები, ისე ჩვენი უბრალო მოქალაქეებიც. მეც ჩემს წრეში გამოვაცხადე ჩემი პირობა. ხომ სულ გვესმოდა მამარდაშვილი... მამარდაშვილი... ელენე ჩემი შვილის ბავშვობის მეგობარია, ჩემს თვალწინ გაზრდილი გოგონა. ველოდებოდი,, როდის ექნებოდათ ქორწილი, რომ მის კაბაზე მეზრუნა. სანამ ბავშვის სქესის გაგების ცერემონია ჩატარდებოდა, წინადღეს ელენეს მეგობარმა დამირეკა და ამ ღონისძიების შესახებ მომიყვა. სწორედ მაშინ დავუკავშირდი ელენეს და კაბის შეკერვა შევთავაზე. სრულიად უანგარო ნაბიჯი იყო, რომელიც დიდი სიყვარულით და ამ საერთო სიხარულის ფონზე გადავდგი. მინდოდა, მისთვის ემოციური საჩუქარი გამეკეთებინა. საკუთარ თავთანაც მართალი ვიქნებოდი, რომ პირობა შევასრულე. ამისრულდა ჩემი ჩანაფიქრიც... მეორე დღეს მოვიდა ელენე და დავიწყეთ კაბაზე მუშაობა“.

კაბა უნდა ყოფილიყო კომფორტული, მოკლე, მოკრძალებული, მაგრამ მრავლისმთქმელი. შეჩერდნენ უტრირებულ თეძოებზე. ამ გადაწყვეტით ნაკლები აქცენტი გაკეთდა მკერდზე. გამოვიდა სხეულზე მომდგარი კორსეტი წინ მოჭრილი ხაზით. გამჭვირვალე კორსეტთან მკაცრი ხაზები და მიმაგრებული ყავავილები ულამაზეს გადაწყვეტილებად იქცა. ყვავილები ქსოვილებიდან ამოიღეს.

„როცა კაბა დასრულდა, მისი ცქერა ერთი სიამოვნება იყო“ - აღნიშნავს დიზაინერი. აქვე ამატებს: “ტექნოლოგიურად საკმაოდ რთული სამუშაო გავწიე. მჭიდროდ მომდგარი, მდგრადი კაბა უნდა ყოფილიყო იდეალური, რომ ფეხმძიმე ქალს არ დარღვეოდა პროპორციები და მასში თავი კომფორტულად ეგრძნო.“

როგორც ლალიკო აღნიშნავს, ეს სამზადისი იყო თბილი და ემოციური. მიუხედავად იმისა, რომ ამ პროცესს თან ახლდა შეზღუდული დრო:

„საოცრად ემოციური დღე იყო, როცა ბავშვის სქესის გაგების ცერემონიალი გაიმართა. უსაზღვროდ ბედნიერი ვიყავი, რადგან ამ საერთო სიხარულში მეც ვიღებდი მონაწილეობას. ეს კაბა, ვიდეოებისა თუ ფოტო კადრების სახით, ხომ ცხოვრების ბოლომდე გაჰყვება წყვილს. ეს მიმართება არ დამვიწყნია, სწორედ ამ განწყობით ვიმუშავე... წლების შემდეგ ელენე უკან რომ მოიხედავს, სულ უნდა მოსწონდეს, არ უნდა დასწყდეს გული, რომ არჩევანში შეცდა..“